សៀវភៅណែនាំពីឧបករណ៍ និងការទំនាក់ទំនងដ៏មានសុវត្ថិភាពនៅលើអុីនធឺណិត
សៀវភៅណែនាំនេះត្រូវបានរៀបចំឡើងដោយអង្គការ Localization Lab សហការជាមួយអ្នកជំនាញផ្នែកសុវត្ថិភាពឌីជីថល វិចត្រករ និងអ្នករចនានៅដើមឆ្នាំ២០២២ ដើម្បីធ្វើឱ្យកូនសៀវភៅតូច តែខ្លឹមនេះមានអត្ថប្រយោជន៍ដ៏មហាសាលដល់ប្រជាជនខ្មែរទាំងអស់។
ផ្នែកដំបូងនៃមាតិកាសំខាន់ៗនៅក្នុងកូនសៀវភៅនេះ មានរូបត្លុកបង្ហាញពីសាច់រឿងខ្លីដ៏គួរឱ្យទាក់ទាញចំនួន ៤រឿង ដូចជា៖
រឿង “ស៊ីត្រាវ”
រឿង “VPN ភ្ជាប់ស្នេហ៍”
រឿង “លោកគ្រូបែកធ្លាយ”
និងរឿង “ឈុតក្នុងនាំរឿង”។
អ្នកគ្រាន់តែបានអានចំណងជើងនៃរឿងខ្លីទាំងបួននេះ ប្រាកដណាស់ អ្នកពិតជាមិនអាចមិនទាញយកកូនសៀវភៅនេះនោះទេ។
ឈប់សិន! យើងចង់ប្រាប់ថា ក្រៅពីរឿងខ្លីទាំងបួននេះ យើងក៏មានណែនាំពីកម្មវិធីទូរស័ព្ទដ៏មានសុវត្ថិភាពនាពេលបច្ចុប្បន្នក្នុងការទំនាក់ទំនងឈ្មោះ Signal ព្រមទាំងឧបករណ៍សំខាន់ៗក្នុងការប្រើប្រាស់ប្រចាំថ្ងៃដើម្បីចែករំលែកឯកសារ ឬការស្រាវជ្រាវនៅលើអ៊ីនធឺណិតដោយសុវត្ថិភាព និងអនាមិកផងដែរ ដូចជា OnionShare, VPN, Tor Browser និង Onion Browser។
ការចែករំលែកដ៏មានសារសំខាន់នេះ គឺមានគោលបំណងពង្រឹងសមត្ថភាពដល់អ្នកជំនួញ បុគ្គលិកក្រុមហ៊ុន និយោជក បុគ្គលិកអង្គការ អ្នកកាសែត មន្ត្រីរាជការ អ្នកធ្វើការក្នុងសហគមន៍ សិស្ស និស្សិត និងអ្នកដែលគិតដល់ឯកជនភាព ដើម្បីឈ្វេងយល់ និងប្រើប្រាស់អុីនធឺណិតដោយសុវត្ថិភាព។
តើ Signal ជាអ្វី?
Signal ជាកម្មវិធីឈែតដែលមានសុវត្ថិភាព ប្រើប្រាស់កូដចំហ (Open Source) និងមានកូដនីយកម្មសងខាង (End to End Encryption)។ អ្នកប្រើប្រាស់អាចផ្ញើសារជាអក្សរ សំឡេង រូបភាព វីដេអូ ឯកសារ ការហៅចេញជាសំឡេង ឬវីដេអូដោយមិនគិតថ្លៃ។
តើ OnionShare ជាអ្វី?
OnionShare គឺជាកម្មវិធីបើកចំហកូដ និងមិនគិតថ្លៃ ដោយអ្នកប្រើប្រាស់អាចចែករំលែកឯកសារដោយមិនកំណត់ទំហំ បង្ហោះវេបសាយ និងឈែតជាមួយមិត្តភ័ក្តិ ឬក្រុមការងារដោយសុវត្ថិភាព និងអនាមិកតាមរយៈការប្រើប្រាស់បណ្ដាញ Tor។
តើ VPN ជាអ្វី?
VPN ជាបណ្ដាញឯកជននិម្មិតដែលបង្កើតច្រកឯកជន ដើម្បីភ្ជាប់ទៅកាន់បណ្ដាញមួយទៀតនៅលើអុីនធឺណិតដោយសុវត្ថិភាព ដោយវាធ្វើកូដនីយកម្មចរាចរណ៍អុីនធឺណិត លាក់អាសយដ្ឋាន IP និងទីតាំងរបស់អ្នក។ VPN អនុញ្ញាតឱ្យអ្នកអាចបើកមើលវេបសាយដែលត្រូវគេប្លុក និងជៀសផុតពីការឃ្លាំមើលនៅលើអុីនធឺណិតផងដែរ។
តើ Tor Browser ជាអ្វី?
Tor ជាកម្មវិធីរុករកដែលប្រើប្រាស់បណ្តាញឯកជនរបស់ Tor ដើម្បីការពារឯកជនភាព និងបិទបាំងអត្តសញ្ញាណរបស់អ្នកនៅលើអុីនធឺណិតមានសុវត្ថិភាពខ្ពស់។ Tor ជាកម្មវិធីដែលបើកកូដចំហ (Open Source) និងមិនរក្សាទុកប្រវត្តិនៃការប្រើប្រាស់អុីនធឺណេតរបស់អ្នកនោះទេ។
Tor គឺសម្រាប់អ្នកប្រើប្រាស់ប្រព័ន្ធប្រតិបត្តិការ Windows, MacOS, Linux និង Android។
តើ Onion Browser ជាអ្វី?
Onion ជាកម្មវិធីរុករកដែលប្រើប្រាស់បណ្តាញឯកជនរបស់ Tor ដើម្បីការពារឯកជនភាព និងបិទបាំងអត្តសញ្ញាណរបស់អ្នកនៅលើអុីនធឺណិតមានសុវត្ថិភាពខ្ពស់។ Onion ជាកម្មវិធីដែលបើកកូដចំហ (Open Source) និងមិនរក្សាទុកប្រវត្តិនៃការប្រើប្រាស់អុីនធឺណេតរបស់អ្នកនោះទេ។
កម្មវិធីរុករក Onion គឺសម្រាប់អ្នកប្រើប្រាស់ប្រព័ន្ធប្រតិបត្តិការ iOS មានដូចជា iPhone និង iPad។